თქვენი კალათა
თქვენს კალათაში აღარ არის პროდუქტი
Layering, ანუ მრავალშრიანი ჩაცმულობის ხელოვნება: რჩევები და იდეები
ცივი ამინდის დადგომა მოდური ექსპერიმენტებისთვის იდეალური დროა. თუ ზაფხულში ზოგჯერ ერთ მაისურსა და შორტზე მეტის ჩაცმა არ შეგვიძლია, შემოდგომა-ზამთარი შესანიშნავ შესაძლებლობას გვაძლევს რამდენიმე ელემენტი ერთმანეთს შევუხამოთ და საინტერესო, ორიგინალური კომბინაციები შევქმნათ.
მრავალშრიანი ჩაცმულობა, ანუ layering, სტილის ინდივიდუალიზების ერთ-ერთი ყველაზე მრავალმხრივი და პრაქტიკული ხერხია. რამდენიმე შრის შესაქმნელად სხვადასხვა ტანსაცმლის დაწყვილება საშუალებას გაძლევს შექმნა საინტერესო ლუქები და პერსონალურ სტილს მეტად გაუსვა ხაზი.
ამ ბლოგში მარტივად აგიხსნით, როგორ უნდა გამოიყენო layering ტექნიკა მაქსიმალურად ეფექტურად. და თუ რომელიმე ელემენტი განსაკუთრებით მოგეწონა, აუცილებლად გვეწვიე ონლაინ მაღაზია dressup.ge-ში — ჩვენთან მარტივად იპოვი ფავორიტი ლუქის შექმნისთვის საჭირო ელემენტებს.
რა არის Layering, ანუ მრავალშრიანი ჩაცმა?
სულ ცოტა ხნის წინ მრავალშრიანი ჩაცმა მხოლოდ პრაქტიკულ მეთოდან აღიქმებოდა და ადამიანის პერსონალური სტილის შექმნასთან არსებითი შეხება არ ქონდა. დღეს კი Layering ინდივიდუალიზმის ესთეტიკისა და პრაქტიკულობის დაბალანსების საუკეთესო გზად ითვლება.
პრაქტიკული დატვირთვა თერმორეგულაციაშია: რამდენიმე ფენა ტანსაცმელი სხეულის სითბოს უფრო ეფექტურად ინარჩუნებს, რადგან ფენებს შორის ჰაერი უკეთ კავდება. სტილის თვალსაზრისით კი მრავალშრიანი ჩაცმა საშუალებას იძლევა ერთმანეთს შეუხამო მეტი ფერი, ტექსტურა თუ სილუეტი და ყოველდღიურ უბრალო ლუქს დამატებითი განზომილება შესძინო. ეს მიდგომა გარდერობის თითოეულ ნივთს დინამიკურ „სამშენებლო ბლოკად“ აქცევს.
როდესაც მრავალშრიან კომბინაციაში ვიყენებთ, ერთი შეხედვით სადა, არაფრით გამორჩეული ტანსაცმელიც შეიძლება სრულიად განსხვავებულად წარმოგვიდგეს. სტანდარტული ქალის მაისური ჯინსის ქურთუკის ქვეშ სულ სხვა ეფექტს იწვევს, ვიდრე კლასიკურ ელეგანტურ პიჯაკთან დაწყვილებისას. ხოლო კლასიკური მამაკაცის პერანგი შეგიძლია გამოიყენო როგორც ელეგანტური smart casual ლუქისთვის (კლასიკური რბილი სვიტერის ქვეშ) ისე მკაცრი და ოფიციალური — პიჯაკთან ერთად, ან თუნდაც საერთოდ არაფორმალური — უბრალო სადა მაისურზე თუ მოიცვამ.
"სამი შრის პრინციპი"
ყველაზე მარტივი ფორმულა მრავალშრიანი ლუქის ასაწყობად „სამი შრის პრინციპია“:
- პირველი შრე (Base Layer): უნდა იყოს შენი ლუქის საფუძველი. ამ შრის მთავარი ფუნქცია კომფორტი და ტენიანობის მართვაა. იდეალურია სუნთქვადი, ბუნებრივი ქსოვილისგან შექმნილი სადა სამოსი: მაისურები, თხელი გოლფები ან, უფრო ორიგინალური ელემენტისთვის - ბოდეები.
- მეორე შრე (Mid Layer): მთავარი საიზოლაციო შრე, რომელიც სითბოს უზრუნველყოფს და, ამავდროულად, შეგიძლია შენი სტილის მაქსიმალურად პერსონალიზებისთვის გამოიყენო. ეს შეიძლება იყოს ფერადი სვიტერი, ჟაკეტი, მასიური კარდიგანი ან ოვერსაიზ პრინტიანი მაისურიც კი — რაც შენს გულს გაუხარდება.
- მესამე შრე (Outer Layer): გარე შრე, რომელიც თან ამინდისგან გიცავს და თან შენს სტილზე პირველ წარმოდგენას უქმნის გარემოცვას. თუ კლასიკური ლუქის შექმნა გინდა — იდეალურია კლასიკური პალტო, თუ smart casual — მინიმალისტური ტრენჩი დაგეხმარება, ხოლო თუ უფრო ახალგაზრდული ან მეამბოხე იმიჯი გინდა მოირგო — ჯინსის ან ტყავის ქურთუკი.
მრავალშრიანად ჩაცმის ფორმულები ქალებისთვის
ყოველდღიური სტილი
დაიწყე საბაზისო მაისურით და შეუხამე თავისუფალი სტილის პერანგი ან თხელი კარდიგანი. ეს ლუქი დაასრულე კლასიკური ტრენჩით. რადგან აქცენტი ზედა ჩაცმულობაზეა, უბრალოდ ქალის ჯინსი და კომფორტული ფეხსაცმელი საკმარისი იქნება.
Smart Casual
აბრეშუმის ბლუზას ან სადა ერთფერ ტოპს შეუხამე კარგი თარგის, კლასიკური პიჯაკი. ეს კომბინაცია მომენტალურად ქმნის დახვეწილ იერს. ქუჩაში დაუწყვილე კლასიკური შალის პალტო — თუ ქვედა შრეები სადა ტონებშია, პალტო შეგიძლია უფრო “მყვირალა” ფერის აარჩიო (მაგ. მკვეთრი ფერის ტარტანი)
ელეგანტური ლუქისთვის
განსაკუთრებული ღონისძიებისთვის შენი ლუქის საფუძველი სავარაუდოდ სადა, ელეგანტური კაბა იქნება, რომელსაც ზემოდან მოისხამ კლასიკურ მოსაცმელს. ამ შემთხვევაში მომდგარი ოდნავ წელში გამოყვანილი ქალის პალტო არა მხოლოდ სითბოს შეგინარჩუნებს, არამედ სილუეტს დახვეწილ იერს მიანიჭებს. კაბასა და პალტოს შორის დამატებითი შრისთვის კი შეგიძლია დიდი შალის შარფი გამოიყენო.
მრავალშრიანად ჩაცმის ფორმულები კაცებისთვის
ყოველდღიური სტილი
კაცის ყოველდღიური layering-ის საფუძველი ხარისხიანი ნივთებია. ბაზად აიღე კლასიკური მამაკაცის მაისური, მეორე შრისთვის ზემოდან მოიცვი თავისუფალი სტილის პერანგი და დაასრულე ჯინსის ან ტყავის ქურთუკით. ეს კომბინაცია ჯინსებთან ან ჩინოსებთან ერთად თან მოდურად და თან მოწესრიგებულ გამოიყურება.
Smart Casual
თანამედროვე საქმიანი სტილისთვის იდეალურია თუ დაიწყებ კლასიკური პერანგით, რომელსაც შეუხამებ თხელ მამაკაცის სვიტერს ცოტა ღრმა V-ყელით (რათა პერანგის საყელოს გადმოკეცვა შეძლო) ან სულაც უსახელო პულოვერს. ეს კომბინაცია შეგიძლია სპორტული სტილის პიჯაკით დაასრულო.
ან შეგიძლია, კლასიკური პერანგის ნაცვლად, პოლოს მაისური აიღო და კლასიკური მამაკაცის პიჯაკი მოიცვა.
ელეგანტური ლუქისთვის
ფორმალური ღონისძიებისთვის დაიწყე მაღალი ხარისხის თეთრი ან ღია ცისფერი პერანგით, შეუხამე კლასიკური ჟილეტი ან უსახელო პულოვერი, ხოლო დაასრულე იდეალურად მორგებული პიჯაკით ან ელეგანტური პალტოთი.
ზოგადი წესები: რა უნდა გაითვალისწინოთ მრავალშრიანი ლუქის შექმნისას
რას უნდა მივაქციოთ ყურადღება
- პროპორციები: layering-ის მთავარი საიდუმლო სილუეტის ბალანსშია. თუ ერთი ფენა მოცულობითი და თავისუფალია, დანარჩენი უფრო ტანზე მომდგარი შეარჩიე, რათა ლუქი უფორმო ან გადატვირთული არ გამოვიდეს.
- ტექსტურები: კარგი ბალანსი ლუქს მომენტალურად ამდიდრებს და სიღრმეს სძენს. დააწყვილე ერთმანეთისგან განსხვავებული ტექსტურის სამოსი, რათა მდიდარი ვიზუალური და ტაქტილური გამოცდილება შექმნა. თუმცა არ გადატვირთო ლუქი — თუ ერთი შრე, ვთქვათ მოცულობითი ნაქსოვი კარდიგანია, მეორე ჯობია გლუვი ქსოვილისგან იყოს.
- სიგრძე: მოერიდე ისეთ ლუქს, სადაც ყველა ფენა ერთ ხაზზე მთავრდება, რადგან ეს ვიზუალურად „ჭრის“ სილუეტს. ამის ნაცვლად, შექმენი ასიმეტრია, სადაც თითოეული შრე ჩანს. თუ გინდა ყველა დეტალი გამოჩნდეს, ყველაზე გრძელი ფენა ტანთან ყველაზე ახლოს უნდა იყოს, ხოლო ყოველი მომდევნო ოდნავ მოკლე.
რა შეცდომებს ვუშვებთ layering-ის დროს
- ზედმეტი მოცულობა: ყველაზე ხშირი შეცდომა ერთდროულად რამდენიმე სქელი და მოცულობითი ნივთის ჩაცმაა, რაც „კომბოსტოს“ ეფექტს ქმნის და მოძრაობას ზღუდავს. დაიცავი პრინციპი „თხელიდან სქელისკენ“ — ყველაზე თხელი ქსოვილი ჩაიცვი პირველ შრედ.
- არასწორი ზომა: ოვერსაიზი არ ნიშნავს უბრალოდ დიდი ზომის ტანსაცმლის ჩაცმას. ასეთი სამოსიც კი მხრებზე სწორად უნდა იჯდეს. უფორმო და ცუდად მორგებული ნივთი, თუნდაც ის ტრენდული იყოს, ნებისმიერ ლუქს აფუჭებს.
- ფერებისა და პრინტების სიმრავლე: Layering თავისთავად ბევრ ვიზუალურ დეტალს აერთიანებს, ამიტომ ფერების პალიტრა აკონტროლე. შეარჩიე 2-3 ძირითადი, ერთმანეთთან შეხამებული ფერი. თუ პრინტებს ურევ, ეცადე, მათი მასშტაბი განსხვავებული იყოს (მაგალითად, წვრილი ზოლი მსხვილ უჯრასთან) და ერთი საერთო ფერი დომინანტობდეს.
