„ბავშვთა თასი“ გიგანტურ სლალომში

7 მარტს, Dressup.ge-ისა და ა(ა)იპ „ბაკურიანის მთის კლუბების ასოციაციის“ ორგანიზებით, ბაკურიანში საბავშვო სათხილამურო შეჯიბრება - „ბავშვთა თასი“ გიგანტურ სლალომში, დიდველის ტრასაზე ჩატარდა! 

Dressup.ge-ს და შეჯიბრების ორგანიზატორების მიზანია ჯანმრთელი ცხოვრების, მთისა და სათხილამურო სპორტის პოპულარიზება ბავშვებში და მათ მშობლებში. ეს ერთადერთი სათხილამურო შეჯიბრებაა საქართველოში, რომელიც 10, 12 და 14-წლამდელთა ასაკობრივ კატეგორიაში ტარდება. ეს მონაწილეებს პატარა ასაკიდანვე აძლევს საშეჯიბრო გამოცდილებასა და ჯანსაღი კონკურენციის განცდას.  ტურნირის საფესტივალო და სადღესასწაულო განწყობა თავიდანვე აყვარებს ბავშვებს სათხილამურო სპორტს და მოტივაციას აძლევს მწვრთნელებსა და მშობლებს ხელი შეუწყონ მომავალი სპორტსმენის განვითარებას.

შეჯიბრება 2018 წლიდან რეგულარულად ტარდება და ბაკურიანში ბაზირებული სპორტსკოლები მონაწილეობენ („სკი ჰაუსი“, „რატის სკოლა“, „იკისკი“, „ბასტი“, „კოხტა კუდები“, „ანიტას სკოლა“, „იქსტრიმი“), ისევე როგორც საქართველოს რეგიონების სათხილამურო გუნდები (გუდაური, ბაკურიანი, სვანეთი, აჭარა).

დღის ბოლოს გაიმართა გამარჯვებულთა დაჯილდოება. საპრიზო ადგილებზე გასულებს dressup.ge-ის მიერ გამოყოფილი პრიზები გადაეცათ. ასევე გათამაშდა  გარდამავალი თასი, რომელიც ყველაზე წარმატებული გუნდის მთავარ მწვრთნელისთვის იყო განკუთვნილი.