თქვენი ჩანთა
თქვენს კალათაში აღარ არის პროდუქტი
- სიახლეები
- 49138 ნახვა
30 წელი: დრესაპ ჯგუფის მოგზაურობა
ქართული მოდის გულში დრესაპს საკუთარი, ხშირად ხმაურიანი, თუმცა გამოყოფილი და დასამახსოვრებელი ადგილი აქვს. აქედან კი გამუდმებით მოისმის ფეთქვა, რომელიც თავისუფლების იდეებიდან იღებს ენერგიას. ჩვენეული დღესასწაული მხოლოდ 30 წლის იუბილის აღნიშვნას არ მოიაზრებს. ეს არის ერთგვარი მომენტი, ერთვარი ნიშანი, ჩამოვსხდეთ და გადავხედოთ წარსულს, დავფიქრდეთ განვლილ გზასა თუ ამბებზე, რომელიც თავს გადაგვხდა და დაგვამახსოვრდა.
ყველაფერი ჯინსებში აღმოცენებული თავისუფლებიდან დაიწყო. ასე გაიხსნა Levi's-ის მაღაზია 1994 წელს, დღეს კი უკვე თქვენც კარგად მოგეხსენებათ რამდენი ჯინსი, პერანგი, კაბა, ფეხსაცმელი თუ აქსესუარი მოიძებნება ჩვენს მაღაზიებში. რა გინდა სულო და გულო: Levi’s, Calvin Klein, Tommy Hilfiger, Guess, Lacoste, GANT, Lee & Wrangler, Samsonite, Etam, Vans, Adidas და სხვანიც მრავლად!
დრესაპის ხედვა თავიდანვე ნათელი იყო: ქართველი ხალხისთვის მიგვეტანა მრავალფეროვანი სტილის არჩევანი და უნიკალური იდენტობა. შესაბამისად განვლილი სამი ათწლეულის განმავლობაში, მრავლად იყო (და დღესაც მრავლად გასტანს) ნოსტალგიური და სენტიმენტალური განცდები, იქნებოდა ეს ნანატრი ბრენდები თუ სხვა. მრავალმხრივ განვითარებას გამუდმებით თან სდევდა სურვილი, კომპანია გამცდარიყო ბიზნეს-ინტერესის ჩარჩოებს, მიუხედავად იმისა, იქნებოდა ეს სვლა მომგებიანი თუ არა კონკრეტული პერიოდისთვის. დრესაპი ყოველთვის ცდილობდა საბოლოო პასუხი მომხმარებლისაგან მიეღო და თითქოს მიყვებოდა კიდეც იმ ტალღას, რომელიც ხალხის მხრიდან იყო ნაკარნახევი.
ამ 30 წლის განმავლობაში 80-ზე მეტი მაღაზია გაიხსნა საქართველოს 4 სხვადასხვა ქალაქში. მშვენიერი რიცხვებია, არა? უფრო მშვენიერსაც გეტყვით. ერთია, როდესაც საკუთარ განვითარებაზე ზრუნავ, მაგრამ სოციალური პასუხისმგებლობა ხომ ბევრს ნიშნავს? დღესდღეობით დრესაპში 1000-მდე თანამშრომელი იყრის თავს, რაოდენობა კი წლიდან წლამდე იზრდება.
ჩვენს ბლოგებს თუ თვალს ადევნებთ უკვე გეცოდინებათ ამბავი ფერეიდნელების შესახებ. მოძრაობა #არაბარბარიზმებს-ზე რას იტყოდით? (თუკი არ წაგიკითხავთ, აუცილებლად გირჩევთ ამ მშვენიერ ამბებს გაეცნოთ!).
დიახ, დიახ, დრესაპ ჯგუფმა არაერთ ფერეიდნელის საქართველოში ჩამოსვლას შეუწყო ხელი, რამდენიმე მათგანი დღეს ჩვენთან მუშაობს. მოძრაობა #არაბარბიზმებს კი დღითიდღე უწყობს ხელს ქართული ენის გაჯანსაღებას. ეს უკანასკნელი, შეიძლება ითქვას, იდეალურად გამოხატავს ჩვენს სურვილებს. მნიშვნელოვანია, საქართველოსთვის და თითოეული ქართველისთვის ხელმისაწვდომი იყოს საერთაშორისო ბრენდები, ცნობილი იყოს, რისი თქმა სურთ ამა თუ იმ კოლექციით და რა ღირებულებებს ატარებენ ისინი. ამასთან ერთად, საკუთარი იდენტობაც უნდა აღმოვაჩინოთ. ჩვენს მაღაზიებში არაერთი ქართული პროდუქტი გამოჩენილა, დრესაპისთვის კი განსაკუთრებით მნიშვნელოვანი „სავალი“ და „ატრიო | რუსო-ა“, რომლებიც ჩვენსავე საწარმოში იქმნება.
სამომავლო გეგმები? სამომავლო გეგმები ყველას უფრო აინტერესებს. რაღაც უცხოსა და ახლის გაგება გვინდა ხოლმე ადამიანებს. დრესაპის გეგმები კვლავ მასშტაბურია, როგორც ყოველთვის. სულ მალე სასაწყობე მეურნეობა ახალი განვითარების ეტაპზე გადავა. ელ-კომერციის დეპარტამენტი კი ინარჩუნებს 2023 წლის ტემპს და მრავალ სიახლეს გვპირდება. ესეც ასე, აღნიშნეთ დრესაპის იუბილე ჩვენთან ერთად, წინ მრავალი საინტერესო მოგონება გველის, მანამდე კი ჩვენს მაღაზიებში და ონლაინ განსაკუთრებული შეთავაზება გელოდებათ.
© ნიკა "ვარდო" ვარდიაშვილი