თქვენი ჩანთა
თქვენს კალათაში აღარ არის პროდუქტი
- სიახლეები
- 5206 ნახვა
შემოდგომა-ზამთრის სეზონის მთავარი ტენდენციები
შემოდგომა-ზამთრის დადგომასთან ერთად კვლავ აქტუალურია მოდაზე თუ მოდის ტენდენციებზე საუბარი. ყოველ წელს სხვადასხვა ქსოვილები თუ აქსესუარები ერთობლივად ქმნიან ახალ და გამორჩეულ სტილს, რომელიც ყოველდღიური მოდის განსაახლებლადაა საჭირო. ამ ბლოგში შევეცდებით ის მიმართულებები მიმოვიხილოთ, რომელიც შენი ავთენტური სტილის შექმნაში დაგეხმარება და თანაც შესაბამისი იქნება შემოდგომის განწყობისთვის.
Cherry Brown: მკაცრი, ყავისფერ-ბორდოსფერი ელეგანტურობა
წარმოიდგინეთ, შემოდგომის დილა, მზის სხივებით გაჯერებული ტყე, სადაც ყავისფრის ღრმა ტონალობები ბორდოსფერში გადადის. წარმოიდგინეთ? ზუსტად ასე გამოიყურება Cherry Brown, რომელიც ამ სეზონის მთავარ როლში გვევლინება. მასში ერთდროულად იგრძნობა მდიდრულობის, მკაცრი, თუმცა მაინც მეტწილად ფემინური განწყობა. ეს ფერი ელეგანტურად ერწყმის მომავალ ცივ ამინდებს. მისი აღმოჩენა ტანსაცმლისა და ფეხსაცმლის გარდა, აქსესუარებშიცაა შესაძლებელი, იქნება ეს ჩანთები, ქამრები თუ სხვა, მაგრამ რა თქმა უნდა, სათვალეებში, რომელიც თქვენს ყოველდღიურ სტილს პირდაპირი და გადატანითი მნიშვნელობით ცოცხალ ელფერს შესძენს.
Green, Green, Green: სანამ, გაზაფხული დაბრუნდება
მწვანე ფერი თითქოს ყოველ წელს ცდილობს, რომ ჩვენს გარდერობში ადგილი დაიბრუნოს, მაგრამ ამ სეზონზე ყველაზე მეტი შრომა გასწია! მისი სხვადასხვა ტონალობა, იქნება ეს პასტელური თუ კაშკაშა, ამ სეზონზე ყველგან შეგვხვდება. მწვანე ფერი - ეს არის ნიუანსი, რომელიც შემოდგომისა და ზამთრის მუქ და ნაცრისფერ გარემოს ბუნების ძალით აცოცხლებს. ჩაიცვით მწვანე და იგრძენით, როგორ გადადის თქვენი ყოველდღიური ცხოვრება უბრალოებიდან ფერად-ფერად დადგმამდე.
Statement: მეტი ინდივიდუალიზმისთვის
ეს ტრენდული აქსესუარები უკვე მერამდენე სეზონია ჩვენი ტანსაცმლის „სიმფონიაში“ მნიშვნელოვან ნოტად რჩება. მაგრამ ამ სეზონზე ისინი წინა პლანზე გადმოდიან, როგორც კრეატიულობისა და ინდივიდუალურობის სიმბოლო, გარდა სამკაულებისა მის აღმოჩენას ქამრების სექციაშიც შევძლებთ. საინტერესოა, რომ ამ მცირე დეტალის დამატებით შესაძლებელია, როგორც მინიმალისტური, ასევე მაქსიმალისტური სტილის შექმნა. მოკლედ, აირჩიეთ Statement, როგორც საბოლოო წერტილი თქვენი ლუქის შექმნისას.
მინი ქვედაბოლოები და მაღალი ჩექმები: 2010-იანი წლების მოგონებები
2010-იან წლებში ეს ტრენდი სუპერმოდელების ტანსაცმლის განუყოფელი ნაწილი იყო, ახლა კი ის კვლავ ბრუნდება, მაგრამ ახალ შეხედულებასთან ერთად. მინი ქვედაბოლოები და მუხლამდე ჩექმები არა მხოლოდ სილამაზის სტანდარტებს აბალანსებს, არამედ გარკვეულ სიმბოლოდაც იქცა – რადგან სულაც აღარ არის საჭირო სუპერმოდელობა, იმისათვის რომ მსგავსი ჩაცმულობა მოირგოთ.
2024-2025 წლები კიდევ მრავალ სიურპრიზს გვიმზადებს წინ. თითოეულ დღეს ახალი ტრენდების დაბადება სდევს თან. თქვენც რაღა დაგრჩენიათ, ამოირჩიეთ თქვენი საყვარელი მიმართულება, შექმენით სასურველი ლუქსი და დაელოდეთ, კომპლიმენტების მოსმენა ხშირად მოგიწევთ!