თქვენი ჩანთა
თქვენს კალათაში აღარ არის პროდუქტი
- სიახლეები
- 8235 ნახვა
Vans - კულტურა, მსოფლიოს ქუჩებში
რამდენჯერ შეგინიშნავთ, რამდენჯერ დაკვირვებიხართ, რამდენჯერ გაგიყოლებიათ თვალი - ერთი თითქოსდა უმნიშვნელო დეტალისთვის, რომელიც გაელვებასავით აღბეჭდილა ფეხსაცმელებზე. Vans - ის ამბავი გასული საუკუნის 60-იანი წლებიდან კალიფორნიაში, ანაჰეიმში იწყება. ყოველდღიურ ცხოვრებაში გაკულტებულ ამ ბრენდს გამორჩეული, თუმცა საკმაოდ მოკრძალებული ისტორია აქვს. გზამკვლევს თუ მივყვებით, Vans-ის ევოლუცია პოლ ვან დორენის „კაუჩუკის კომპანიიდან“ უნდა დავიწყოთ.
პოლ ვან დორენი და კაუჩუკის კომპანია - ინოვაციების ერა
1966 წელს პირველი მაღაზია გაიხსნა, რომელსაც Van Doren Rubber Company ეწოდა. ფეხსაცმლის დამზადების მარტივი კონცეფცია, რომელიც კომფორტულ ზედაპირსა და გამძლე, რეზინის ძირებს მოიაზრებდა, მალევე იქცა ხალხის საყვარელ არჩევანად, განსაკუთრებით კი იმის გამო, ყველაფერი ადგილზე რომ მზადდებოდა. იმ დროს ანაჰეიმში ხშირად გაიგებდით დიალოგს:
- საით გაგიწევია? (Where are you going?)
- ვანთან, ახალი ფეხსაცმელი მჭირდება (To Van’s, I need new shoes)
To Van’s - მალევე იქცა ზედმეტსახელად, მეტიც, დაუვიწყარ ზედმეტსახელად, რომელიც თქვენც კარგად მოგეხსენებათ.
ვანსები და სკეიტბორდი
მიუხედავად იმისა, რომ ვან დორენს არ ჰქონია გათვლა სკეიტბორდისტებზე, მათ მალევე შეუყვარდათ მჭიდრო, გამძლე კონსტრუქციისა და წებოვანი ძირის მქონე ფეხსაცმელი. ამ აღმოჩენამ გარდატეხა მოახდინა ბრენდში - რამაც მომავალში Vans და სკეიტბორდინგი განუყოფელ მეგობრებად აქცია.
დღესდღეობით Vans აღნიშნული სპორტის უდიდეს გურუდ ითვლება და უამრავი ღონისძიების, სკეიტ-პარკებისა თუ გალერეების შექმნის ინიციატორია.
სამხრეთ კალიფორნიიდან მსოფლიო ფენომენამდე
სკეიტბორდის პოპულარობის ზრდასთან ერთად, იზრდებოდა ვანსის გავლენაც გლობალურ ასპარეზზე. ბრენდი რეგიონალური ფავორიტობაზე არ შეჩერდა და გეოგრაფიულ საზღვრები გაარღვია. 80-იან და 90-იან წლებში Vans-ის სპორტული ფეხსაცმელი კონტრკულტურის, ამბოხებისა და ინდივიდუალურობის სიმბოლოდ იქცა. თანდათანობით მათ მხატვრებთან, მუსიკოსებთან თუ დიზაინერებთან დაიწყეს თანამშრომლობა და ის უნიკალური კოლექციები შექმნეს, რომელიც უფრო და უფრო ამრავლფეროვნებდა მომხმარებელებსაც და მათ სურვილებსაც. ამ სტრატეგიულმა მიდგომამ Vans-ის სქელძირიანი კედები ყოველდღიურობისთვის იდეალურ ბრენდად გარდაქმნა და სკეიტბორდინგის ვიწრო ჩარჩოები ჩამოაცილა.
Vans დღეს - წარსულისა და ინოვაციების ნაზავი
მიუხედავად მუდმივი განვითარებისა, ბრენდი დღემდე საკუთარი ფესვების ერთგულია. რაც მნიშვნელოვანია, ისინი დღემდე ინარჩუნებენ მდგრადი, გამძლე ფეხსაცმლის კოლექციას და ეკოლოგიურად სუფთა მასალას იყენებენ. 21-ე საუკუნის დადგომასთან ერთად, გაიზარდა კოლაბორაციების რიცხვიც. დღეს, Vans უკვე მოდის მაღალ ეშელონებსაც მისწვდა, ისევე როგორც სპორტის მრავალ სახეობას. საერთოდ არ უნდა გაგიკვირდეთ თუ კაია გერბერის პაპარაცულ ფოტოებში Old Skool-ებს შენიშნავთ, ან Tyler the Creator კონცერტს Vans-ებში გამოწყობილი გამართავს, ანდაც მასთან დუეტში აღმოჩენილი ASAP Rocky ერთ-ორ სიტყვას შეაწევს, რაც იდეალურად გამოხატავს Vans-ის მნიშვნელობას!
ჩანთები და აქსესუარები
გარდა კედებისა, Vans ჩანთებისა და აქსესუარების მრავალფეროვან არჩევანს გვთავაზობს. დაწყებული ზურგჩანთებიდან - წელისჩანთებითა თუ თასმებით დამთავრებული, ქუჩის ესთეტიკა კვლავ აქტუალურია. კვლავ გადააწყდებით ჭადრაკულ ფორმებსა და იმ ფერებს, რომლებსაც ფეხსაცმელებში ხვდებით. მნიშვნელოვანია, რომ ნივთები არა მხოლოდ მოდისთვის, არამედ ყოველდღიური მოხმარებისთვისაა შექმნილი, რაც ურბანულ თავგადასავლებს უფრო მიმზიდველს ხდის. მრავალია კოლაბორაციების რიცხვიც, რომელთა შორისაც მომავალი მეკობრეთა მეფის ადგილიც კი გამოიძებნა.
შეჯამება, საქართველო და Vans
ანაჰეიმში დაწყებული მცირე ბიზნესი დღეს მსოფლიო მოდის განუყოფელი ნაწილია. საზოგადოებრივი ფენომენი - ბრენდი, რომელიც ყოველდღიურობასთან ერთად პულსირებს და გზად წარსულის, მომავლისა თუ აწმყოს დაუვიწყარ დეტალებს აქსოვს. სწორედ ეს არის კულტურა, რომელიც ქუჩებში ავთენტურ, დაუვიწყარ კვალს ტოვებს. ამ ესთეტიკამ საქართველოშიც მოიკიდა ფეხი. უკვე მრავალი წელია Vans-მა FActory-ს მაღაზიებში მოიკიდა ფეხი. დროის გასვლასთან ერთად კი ქართველი ახალგაზრდებში „ვანსელების“ რიცხვი უფრო და უფრო იზრდება, ისევე როგორც განსხვავებული მოდელების რიცხვი დრესაპ ჯგუფის მაღაზიებში. ისე სხვაგან სად (ანაჰეიმში კი ნამდვილად არა), თუმცა აუცილებლად საქართველოში ხომ ნადვილად შეიძლება გაიგონოთ:
„თუ გინდა კარგი შანსები, უნდა ატარო ვანსები!“
© ნიკა "ვარდო" ვარდიაშვილი